வெடிக்கிறது மனதில்
சாலையோர விபத்துச் செய்தியால்
மனதிற்குள் சரவெடி வெடிக்கிறது
உறவினர் கொலைசெய்யப்பட்ட செய்தி
தேகம் எங்கும் மத்தாப்பு கொண்டு
தீ வைத்தது போல எரிகிறது
அத்துமீறி ஆக்கிரமிக்கும் மனிதர்களை காணுகையில்
தீக்குச்சியின் தலையில் தீப்பற்றும் போதெல்லாம்
என்னை எரிப்பது போல வெகுண்டு எழுகிறேன்
புத்தாடைக் கட்டும் போது
நெசவாளர்களின் இறப்பு கண்முன் நிழலாடுது
பலகாரம் உண்ணும் போது
பஞ்சத்தில் இறந்தவர்களின் சடலங்கள்
திரையில் காட்சியாய்
இவற்றையெல்லாம் மறந்து
இயல்பாய் என்னால் கொண்டாட முடியவில்லை
ஆகையால் வெறுமனே சம்பிரதாய
வாழ்த்துகளை பிளாஸ்டிக் புன்னகையோடு மட்டுமே
பகிர முடிகிறது தீப திருநாள் வாழ்த்துக்கள்
